تاند:(دوشنبه، د قوس څوارلسمه) د ننګرهار لپاره د طالبانو والي حاجي ملا محمد نعيم مملې بڼ خړوبولو په موخه د يو نيم ميليون افغانيو په مالي لګښت د دوو څاه ګانو د جوړونې چارې پيل شوې.
د ننګرهار لپاره د طالبانو د والي مطبوعاتي دفتر ويلي،چې حاجي ملا محمد نعيم اخند د يو شمېر مسوولينو په ملتيا د خوږياڼو ولسوالۍ په مملې بڼ کې د يو نيم ميلیون افغانيو په مالي لګښت د دوو څاه ګانو د جوړونې پرانیسته وکړه.
د ننګرهار د کرنې رئیس مولوي عبدالستار محمد ويلي، چې د کرنې او اوبو لګونې وزارت په یو نيم ميليون افغانيو مالي لګښت يې د دې دوو څاه ګانو د جوړونې چارې پيل کړې چې د دوو مياشتو په موده کې به ګټې اخيستنې ته وسپارل شي.
نوموړي وويل، چې يادې څاه ګانې د اتيا متره په ژوروالي کیندل کیږي چې د اته څلویښت سولرونو په نصبولو څخه به ترې د اړتيا پر مهال ياد بڼ خړوبيږي.
د مملې بڼ شاوخوا ۷۰۰ کاله وړاندې شاه جهان پاچال له لوري په دوه اویا جريبه ځمکه کې جوړ شوی چې د هېواد په کچه له مهمو او تاريخي بڼوڼو شمېرل کيږي.