تاند:(یکشنبه، د قوس ديارلسمه) د افغانستان لپاره د پاکستان ځانګړي استازي محمد صادق خان په کابل کې د پاکستان د سفارت د امنيت ساتلو لپاره د ځانګړو تدابيرو خبر ورکړی.
نوموړي د دغو تدابيرو په اړه نور توضیحات نه دې ورکړې.
اوړمه ورځ په کابل کې د پاکستان پر سفارت ناڅرګندو کسانو ډزې وکړې، چې ويل کيږي اصلي هدف ېې د پاکستان د شارژدافیر په نښه کول وو.
په دې ډزو کې د پاکستان د سفارت یو امنیتي کس ټپي شوی.
صادق خان ویلي، چې نوموړی د درملنې لپاره په عاجل ډول پېښور ته لېږدول شوی.
د افغانستان لپاره د پاکستان ځانګړي استازي نوموړی کس « واقعي مجاهد» ګڼلی دی.
د طالبانو د بهرنيو چارو وزير مولوي امیرخان متقي د پاکستان د بهرنيو چارو وزير ته د ټليفوني خبرو پر وخت د دغې پېښې د څېړنې او نورو داسې پېښو د مخنيوي ډاډ ورکړی.
د ياد شوي برید په ورځ په کابل کې د حزب اسلامي د مشر ګلبدين حکمتيار پر کور او جومات هم برید وشو، چې د حکمتيار د ساتونکو مشر پکې وژل شوی او دوه تنه نور ملګري يې ټپيان شوي دي.
د دواړو بريدونو مسووليت چا پر غاړه نه دی اخیستی.