خبریال: داوود جبارخېل-
سونیا احمدي یوه افغان- نارویژۍ سوداګره او د بشري حقونو فعاله ده چې په ناروې کې د کډوالو د حقونو او د افغان ښځو د حقونو دفاع کوي.
هغه د بدلون لپاره د افغان – نارویژی میرمنو بنسټ ایښودونکې او اجراییه رییسه ده، هغه موسسه چې د ناروې په ټولنه کې د کډوالو میرمنو د ادغام او شاملولو لپاره کار کوي.
دا موسسه په کابل کې د خیاطۍ یوه پروژه هم رهبري کوي چې زیانمنې میرمنې سره مرسته وکړي چې د نوي مهارت له زده کولو وروسته د کوچنیو کاروبارونو په پیل کولو سره له مالي پلوه خپلواکه شي.
هغې د ناروې د ساینس او ټکنالوژۍ له پوهنتون څخه په سیاسي علومو کې د لیسانس سند ترلاسه کړی دی.
دا وايي، په ۲۰۰۱ کال کې له پاکستان څخه افغانستان ته شوه. په افغانستان کې ښوونځي او پوهنتون ته لاړه، خو څه ستونزې راپیدا شوې او له افغانستانه وتلو ته اړ شوه. شخصي او کورنۍ ستونزې دې ته اړ کړه چې افغانستان پرېږدي او په ناروې کې د نوي راتلونکې په لټه کې شي.
احمدي زیاتوي: «ناروې ته د دې لپاره راغلې یم چې خپلې موخې درک کړم او خپلو هیلو ته ورسېږم. کله چې زه ناروې ته ورسیدم، ما د ژبې زده کړه پیل کړه او ځان مې جوړ کړ.»
«زه تل هڅه کوم چې افغان میرمنو ته لا زیات خدمت وکړم. ځکه چې زه یوه افغانه ښځه یم او زه پوهیږم چې د یوې افغانې ښځې په توګه څومره ستونزمن کار دی. او کله چې یو سړی محدود وي، زه پوهیږم چې دا څومره دردناک دی کله چې ښځه په څلورو دیوالونو کې محدوده وي او د ځان د پرمختګ فرصت له هغې څخه اخیستل کیږي. کله چې موږ د کډوالۍ په اړه خبرې کوو، دا خورا ستونزمن کار دی ځکه چې یو څوک باید هر څه له پیل څخه پیل کړي. خو مهاجرت د ښځو لپاره ډیر ستونزمن دی ځکه هغه میرمنې چې د دریمې نړۍ له هیوادونو څخه راځي او فکري او مالي خپلواکي نه لري ډیر سخت وخت لري.»
دې همداراز وویل، هغه ښځې چې د افغانستان، پاکستان او سومالیا په څیر هیوادونو څخه راځي او لوړې زده کړې نه لري، په ټولنه کې نه مدغم کیږي ځکه چې دوی په ژبه نه پوهیږي او دا مسله ډیره ستونزمنه ده او د خپګان او انزوا لامل کیږي.
د اغلې احمدي په وینا، په عمومي ډول، په جلاوطنۍ او مهاجرت کې ژوند له ډیرو ستونزو سره مل وي، په ځانګړې توګه که یو څوک د افغانستان په څیر هیواد څخه اروپا ته مهاجرت وکړي؛ خو په عین حال کې دا خپلو موخو ته د رسېدو لپاره ډېر فرصتونه برابروي، چې په افغانستان کې امکان نه لري.
اغلې احمدې د خپلو خبرو په دوام کې وویل: «زه د بدلون لپاره په ناروې کې د مېشتو افغانو ښځو د موسسې بنسټ ایښودونکې او مشره یم او د دې موسسې له لارې په ناروې کې د مېشتو افغان ښځو او نارینه وو د ملاتړ لپاره ځینې اقدامات ترسره کوم او همدارنګه په افغانستان کې دننه له افغانانو سره په نازکو حالاتو کې مرسته کوو. موږ په افغانستان کې د ځینو ښځو لپاره د کار زمینې هم برابروو. اوس مهال د هغو ښځو لپاره چې غواړي ګنډل او کار زده کړي، موږ ورته لازمې اسانتیاوې او وسایل چمتو کوو.»
سونیا احمدي وايي، په ناروې کې د ښځو د حقونو د فعالې په توګه هڅه کوي چې د افغان ښځو غږ واوسي او د افغان ښځو پر ستونزو او ننګونو خبرې وکړي.
«زه د ښځو د حقونو د یوې فعالې په توګه تل د ناروې په نړیوالو کنفرانسونو کې ګډون کوم او د افغان ښځو غږ منعکسوم.»