تاند:(یکشنبه، د قوس ديارلسمه) د طالبانو د بهرنیو چارو وزیر مولوي امير خان متقي د حزب اسلامي مشر انجينر ګلبدین حکمتیار سره وکتل او پرې د شوي برید پر مهال یې د هغه د وژل شويو دوو ساتونکو فاتحه وکړه.
د طالبانو د بهرنيو چارو وزارت په یوه اعلامیه کې راغلي، چې ملا متقي حکمتيار ته د امنیت په برخه کې د لا زیاتو اقداماتو، د ورته پېښو د مخنیوي، د مجرمینو د نیولو او سزا ورکولو په اړه د بشپړ کوښښ ډاډ ورکړ.
سرچينه وايي حکمتیار د هغوی له حال پوښتنې او خواخوږۍ مننه وکړه، او دغه پېښه یې د هیواد د سرسخته دښمنانو کار وباله.
په کابل کې د حزب اسلامي د مشر ګلبدين حکمتيار پر کور او جومات اوړمه ورځ برید وشو، چې د حکمتيار د ساتونکو مشر او يو ساتونکی پکې وژل شوي او دوه تنه نور ملګري يې ټپيان دي.
په همدې ورځ په کابل کې د پاکستان پر سفارت هم ناڅرګندو کسانو برید کړی.
د دواړو بريدونو مسووليت چا پر غاړه نه دی اخیستی.