تاند:(یکشنبه، د قوس ديارلسمه) د طالبانو د لوړو زده کړو وزارت سرپرست شېخ ندامحمد ندیم هرات ته د سفر پر مهال د پوهنتون استادانو د معاشونو د زیاتیدو خبر ورکړی.
نوموړي دا هم ویلي، چې د استادانو پاتی معاشونه به هم ژر ورکړل شي.
معلومه نه ده، چې د استادانو په معاشونو کې څومره زياتوالی راځي.
د طالبانو دغه وزیر په عین حال کې له بهر ته تللو استادانو غوښتي، چې بيرته هېواد ته ستانه شي.
په وروستيو ورځو کې د طالبانو د لوړو زده کړو وزير یو ویډیو کلیپ په ټولنیزو رسنیو کې ډېر لاس په لاس شوی، چې نوموړي پکې د نجونو عصري زده کړې حرامې او فحشا ګڼلي او له دې کبله یې د افغانستان د ازادۍ ګټونکی او مترقي پاچا امان الله خان ته سپکې سپورې ویلي.
د هغه دغه څرګندونې په پراخه کچه د خلکو توندو غبرګونونو سره مخ شوي دي.