تاند:(سې شنبه ،د عقرب اوولسمه) د افغاني سرې میاشتې ټولنه وايي د سولې کلي موسسې په همکارۍ ۵۴ ماشومان چې د د هډوکو ناروغۍ لري او يا سوزيدلي د درملنې لپاره جرمني ته لیږدوي.
د افغاني سرې مياشتې ټولنې لپاره د طالبانو د ادارې مشر مولوي مطيع الحق خالص وويل، چې د دغو ماشومانو درملنه د المان د سولې کلي په مرسته ترسره کېږي.
د جرمني د سولې کلي له ۱۹۸۷ کال راهیسې د یو شمیر ناروغو افغان ماشومانو د درملنې اسانتیاوې برابرې کړي.
تمه کيږي، چې د پنجشنبې په ورځ به د هلکانو او نجونو په ګډون نوي ماشومان ياد شوي هېواد ته د درملنې لپاره ولیږدول شي.
هغه یادونه وکړه چې له دې وروسته به د زړه د سوري لرونکو ناروغانو درملنه په هېواد کې دننه کېږي او بهر ته د لېږلو اړتیا به نه وي.
د هغه په وينا، افغاني سرې مياشتې په هېواد کې د زړه په سوري ناروغۍ د اخته ماشومانو د درملنې لپاره دوه ميليونه ډالره ځانګړي کړي دي.
د جرمني د سولې کلي له ۱۹۸۷ کال راهیسې په ۸۷ ډلو کې ۴۷۰۰ ناروغ ماشومان د درملنې لپاره جرمني ته لېږدولي او له روغېدو وروسته بېرته افغانستان ته ستانه شوي دي.