تاند:(سې شنبه ،د عقرب اوولسمه) د پخواني ولسمشر حامد کرزي ورور او د کندهار د عینومېني د افکو کمپنۍ مشر محمود کرزی وايي، چې د طالبانو ادارې په هېواد کې ممنوع الخروج کړی نه دی.
نوموړي نن په یوه ویډیويي پیغام کې ویلي، چې د طالبانو د عدلیې وزیر د عینومېني د ځینو ستونزو د حل لپاره موقتي او دده په خوښه انتظار کړی.
هغه زياتوي، چې بهر ته د دایمي استوګنې لپاره نه؛ بلکې د وېزې د تمدید لپاره ځي.
د يادونې وړ ده، کې محمود کرزی په پرزول شوي جمهوري نظام کې د ښار جوړونې وروستی وزير و.
له څو ورځو راهيسې ځینو رسنیو د طالبانو له خوا په کابل هوايي ډګر کې د نوموړي د نیول کیدو راپور ورکړی و، خو د طالبانو د ادارې يوه وياند بلال کریمي وویل، چې هغه د عینو مېنې ښارګوټي شریکوال سره ېې د حقوقي ستونزې له امله ممنوع الخروج شوی دی.