تاند:(سی شنبه ،د عقرب لسمه) په جلال اباد کې د انعکاس ټلويزيون يو خبريال نياز محمد خاکسار د نا څرګندو وسله والو له لوري ډبول شوی او ټپي شوی دی.
د انعکاس ټلويزيون د نشراتو مسوول شکرالله پاڅون د دغه خبریال په اړه ويلي:«د نورو ټپونو ترڅنګ يې يوه سترګه سخته ورته ژوبله کړې.»
هغه زياتوي:«دا څووم ځل دی، چې په ننګرهار کې زموږ همکاران وهل ټکول کېږي او ګواښل کېږي او حتی په چيک پواينټونو کې د ولاړو اوسنيو موظفينو له لورې ستغې سپورې ورته ويل کېږي، دا پېښې مو څو ځل د خبريالانو خونديتوب کمېټې سره شريکي کړي، نه پوهېږو ولې يې مخه نه نيول کېږي.»
په ننګرهار کې د طالبانو د حاکمې ادارې چارواکو په دې اړه څه نه دي ويلي.
د طالبانو له بيا واکمنيدو وروسته د انعکاس په ګډون د ننګرهار او هېواد سلګونه نورو رسنیو د تړل کیدو خبر ورکړل شوی.
تېره شپه پخواني ولسمشر حامد کرزي ته منسوب ټلویزیون کابل نیوز هم خپل نشرات ودرول، چې دلیل ېې د اقتصادي ستونزو تر څنګ د طالبانو سخت فشارونه ښودل شوي.
د طالبانو چارواکي او وياندويان د رسنيو پر وړاندې خنډ جوړول او هېواد پرېښودو ته د خبریالانو مجبورول نه تاییدوي.