دا به ښه خبره نه وي.
دلته هېڅوک خپلواک نه، بلکې د يو چا پورې تړلی دی او طالبان له دې توره مستثنی کېدای نه شي.
طالبان مجبور ومکلف دي چې په کور دننه اړخونو سره خبرو ته کښيني او د حل يوه لاره ومومي.

موتکي نو کله خپلواک دی ؟ دا سرینا هوټل کې چای او قهوه څوک څښي؟ تاسوته داسرپرست حکومت چا جوړ کړ؟
تاسو جناب په دې یوه کال کې څومره توره وکړه او خپل هېواد مو په کومو هېوادونو او نړیوالو سازمانونو په رسمیت وپېژانده ؟
خپل ملت ته مو کوم خدمت یادولی شئ ؟
زما مشوره تاسو ته داده چې له خپلو هېوادوالو سره کښېنئ ، مشورې وکړئ ، له مخالفینو سره خپل نظر تبادله کړئ . قدرت که نه تقسیموئ له نظریاتو او مشورو نه یئ ګټه واخلئ . خپل خلک مه وژنئ ، او که داسې انتقامونه اخلئ ، نو د تاسو او هغو پرونیو واکمنانو فرق به په څه کې وي . که هغوی ظلم وکړ ، تاسو یې هم کوئ . که هغوی فاسد او د پردیو غلامان ول ، تاسو هم یاستئ . هغوی د اصلي بادار غلامان ول ، تاسو بیا د پښتو د متل په اساس : د مینځې ، مینځه یاستي . خواره دې شي هغه مینځه چې د مینځې ( پنجابیان ) کالي مینځي . په اتهامونو او کنځلو څه شي لاس ته نه درځي .
راځئ یو بل ته لاس ورکړو ، د قرآني احکامو په رڼا کې یوبل سره مشورې وکړو. یو مضبوط ، باثباته ، متحد او پرمختللی افغانستان جوړ کړو .

ښاغلي متقي صاحب ، تاسو د ملي دفاع ، کورنیو چارو اویا دملي امنیت چې ستاسو په اصطلاح ورته استخبارات وایی ، وزیر اویا رئیس نه یاستی . ستاسو دنده او مکلفیت معلوم دی چې د افغانستان د باندینیو چارو د وزارت سرپرست یاست.
هیله ده هرچېرته ځان مه مشغولوی. له نړیوالو سره تعامل زده کړی او د زاریو پرځای هغو عواملو د له منځه وړلو په برخه کې کار وکړی چې د افغانستان خلک له ستونزو خلاص شي . هره ورځ چې تېریږي زمونږ هېواد پرخپل ځای ولاړ او حتی شاته ځي . نړیوال پرمختګ پر یوه ځای نه دریږي . که ستاسو د ملګرو همدا لجاجت او یو پربل انتقادونه وي ، د تاریخ ټوله ملامتي به ستاسو په غاړه وي . تاسې پرټول هېواد سل په سلو کې حاکم یاستی . ستاسو مخالفین حد اقل د وطن اقتصادي تاسیسات نه ورانوی ، قتل عام نه کوي .
تاسو چې ځان د اسلامي دولت جوړونکی او حامیان بولی ، د نورو په شان اعمال مه کوی .
ستاسو دوست ګاونډی پاکستان تل ستاسو پرځای په نړیوالو محافلو کې ستاسو پرځای خبرې کوي ، پر افغانستان انتقادونه کوی او تاسې ورته د تروریستي ډلو حامیان معرفي کوي .
د مجبورو افغانانو لپاره د پاکستان ویزه یواځې په تور بازار کې تر زرو دالرو لوړه شوېده . باید دا ستونزه د پاکستان له سفیر سره حل کړی . د افغان سوداګرو په مخکې له پاکستان سره ستونزې حل کړی ، دا ستاسو له دندو نه دی ، نه امنیتي پرسونل ته تبلیغ.