تاند:(سی شنبه ،د عقرب لسمه) د پښتونخوا« هنر کور» فرهنګي مرکز له ملتپالنې سره د ځوان پښتون کهول د لیرې والي په اړه مباحثوي غونډه بللې وه.
په دې غونډه کې د ملتپالو ګوندونو او خوځښتونو په ستونزو، د دوی خلاف د مقتدرو قوتونو په دسيسو او حل لارو خبرې شوي.
د یادې ناستې ویناوال پروفېسر ډاکټر عثمان خان و، چې ورسره د هنر کور مشر امجد شهزاد، شهاب چکدروال،اظهار خان ،ډاکټر نور خان ،ننګيال يوسفزي، اقبال حسېن او د نظر نورو خاوندانو هم په بحث کې برخه لرله.
د هنر کور مشر وايي، چې ورته ناستو ته به دوام ورکړي.
د یادونې وړ ده، چې د دغې ناستې په پای کې د ټنګ ټکور پروګرام هم وشو، چې د امجد شهزاد ترڅنګ خضر ياسين ،ابدال شهزاد ـ امن شهزاد، وجدان شهزاد، اتل داوړ ،وياند داوړ او نورو هنري څېرو پکې ګډون کړی و.
دا ناسته په داسې مهال شوې، چې په وروستيو کې د پښتنو مشهور ملتپال سياستوال غلام احمد بلور د پېښور په پارلماني ټاکنو کې د عمران خان تحریک انصاف ګوند له کاندید څخه ماتې وخوړه.
له دې سره، په پښتونخوا کې د ملتپالو ګوندونو او خوځښتونو د کمرنګه کیدو په اړه انديښنې زياتې شوي او فعالان ېې د حل لارو په فکر کې دي.