تاند:(پنجشنبه ،د عقرب پینځمه) د ملګرو ملتونو د مرستو د همغږۍ ادارې د ژمي له رارسيدو سره په افغانستان کې د خلکو د سخت وضعيت په اړه انديښنه څرګنده کړې ده.
دغې ادارې (اوچا) په يوه تازه راپور کې ویلي، چې ۷۹ سلنه افغان کورنۍ د ځان تودولو امکانات نه لري.
ويل شوي، چې دغه ۷۹ سلنه کورنۍ په داسې ځايونو کې اوسيږي، چې ودانيو ته پکې اړتيا ده.
د ۵۶ سلنه نورو افغانانو په اړه ويل شوي، چې لږ تر لږه خپلو ماشومانو ته د ژمنیو لباسونو د برابرولو امکانات نه لري.
ياده اداره په ورته مهال زياتوي، چې د افغانستان د ژمنیو اړتياوو لپاره ېې تر اوسه د غوښتل شوې مرستې ۷۷ سلنه لا هم نه ده موندلې.
اوچا ادارې د ژمنیو مرستو لپاره څلور میلیارده ډالره غوښتې وه، چې تر اوسه ېې يوازې ۳۳ سلنه برابره شوې.
دغه نړيواله اداره ۲۴ میلیونه افغانان د بشري مرستو مستحق بولي.
د نړیوالو ادارو په وروستيو راپورونو کې د افغانستان د فقر ځپلو کچه د ټول هېواد د نفوسو ۹۷ سلنه ښودل شوې ده.
طالب چارواکو هم له نړیوالې ټولنې افغانانو سره د عاجلو مرستو غوښتنه کړې.
د تېر کال په ژمي کې د لوږې له کبله د یو شمېر افغانانو د تلف کيدو راپورونه ورکړل شوي وو او د بشري حقونو یو شمېر فعالان د نورو ورته تلفاتو انديښنه لري.