تاند:(پنجشنبه ،د عقرب پینځمه) د افغانستان لپاره د اروپايي ټولنې ځانګړي استازي توماس نیکلسون يو ځل بيا په افغانستان کې د ټول ګډونه حکومت د رامنځته کیدو غوښتنه کړې ده.
نوموړي په تازه څرګندونو کې ويلي، چې افغانان، د سيمې او نړۍ هېوادونه ټول په دې اړه يو ډول غږ او غوښتنه لري.
هغه د اروپايي پارلمان د بهرنيو اړيکو د کميټې په غونډه کې ټينګار کړی، چې د ټول ګډونه حکومت رامنځته کېدل او د بشري حقونو تامين به په په اوږدمهاله توګه د افغانستان او سيمې د ثبات کيلي وي.
د نوموړي او نورو ډېرو بهرنيو ديپلوماتانو دا غوښتنه بيا-بیا په داسې مهال مطرح کيږي، چې د طالبانو حاکمه اداره ځان د افغانستان ټول شموله حکومت بولي او د بشري حقونو د پوره تامين ادعاوې لري.