تاند:(چار شنبه ،د عقرب څلورمه) د طالبانو د ریاستالوزراء اقتصادي مرستیال ملا عبدالغني برادر اخوند د افغانستان لپاره د چین سفیر وانګ یو سره په لیدنه کې د افغانستان له خاورې د دغه هېواد د انديښنو د حل ډاډ ورکړی.
د نوموړي د دفتر په یوه اعلامیه کې راغلي، چې په دې لیدنه کې دواړو لورو د افغانستان او چین ترمنځ د سترو اقتصادي پروژو د هوکړه شویو مواردو پر عملي کولو او ددې پروژو د عملي چارو پر پیل هر اړخیزې خبرې وکړې.
سرچينه زياتوي:« ملاصاحب وويل، چين او افغانستان تاريخي اړيکې لري موږ د دغو اړيکو لا پراختيا غواړو، چین په نړیوال اقتصادي فورم کې اوسمهال تر ټولو ښه ځای لري او موږ د چین له حکومت څخه غواړو چې په افغانستان کې پانګونه وکړي. »
د هغه په خبره، افغانستان پراخې طبیعي زېرمې لري او اوسمهال په افغانستان کې یو خوندي چاپېریال رامنځته شوی دی.
ملا برادر همدا راز له چین څخه وغوښتل چې افغانستان دې د «یو کمربند او یوه لار» پروژه کې ور داخل کړي.
د چین سفیر وانګ یو د خپلو خبرو پر مهال وویل، چین له افغانستان سره د خپلو اړیکو پراختیا غواړي او په هر حالت کې د نوي حکومت ملاتړ کوي.
د هغه په خبره، چین په همدې موخه په پلان کې لري چې ډېر ژر به په هغو پروژو چې د چین له لوري پیل شوې وې، عملي کار پیل کړي او همدارنګه هغه نورې لویې پروژې چې د نړېوال بانک یا هم د آسیا پراختیایي بانک له لوري تمویلېدې او اوس نیمګړې پاتې دي، غواړي بشپړې کړي.
دده په خبره دوی د طالبانو له حاکمې ادارې څخه غواړي، هغه پروژې چې دوی ته لومړیتوب لري، له دوی سره دې په اړه معلومات شریک کړي، تر څو دوی په دې برخه کې د پانګونې له پاره پلان جوړ کړي.
د چین سفیر زیاته کړه، هېواد یې چمتو دی چې د طالبانو حاکمې ادارې سره خپلو دوه اړخیزو همکاریو او اړیکو ته دوام ورکړي او په دې برخه کې به له هېڅ راز هلو ځلو ډډه ونکړي.
د طالبانو د اعلاميې په اساس، ملا برادر وويل، د طالبانو حاکمه اداره چين ته د ټولو هغو اندېښنو د له منځه وړلو اطمينان ورکوي چې دوى يې د افغانستان له خاورې څخه د پېښېدو په اړه لري.
د طالبانو په اعلامیه کې له افغانستان څخه د چين د مطرح شویو انديښنو په اړه جزييات نه دي ورکړل شوي.
ویل کیږي، چې د ایغور مسلمانان، چې د دغه هېواد د کمونيسټي نظام خلاف فعالیت کوي، چین ورسره د طالبانو له اړیکو انديښمن دی.
چینایي چارواکو په ښکاره په دې اړه څه نه دي ويلي، خو طالب چارواکو د سیمې او نړۍ ټولو هېوادونو ته ډاډ ورکړی، چې د افغانستان خاوره به ېې پر خلاف نه کارول کېږي.