تاند(دوشنبه، د میزان ۲۵ مه) د جرمني حکومت د هغو افغانانو د منلو لپاره، چې د طالبانو تر واک لاندې افغانستان کې له خطر سره مخامخ دي، نوی پروګرام اعلان کړ.
د رویټرز خبري اژانس د راپور له مخې، د جرمني د کورنیو او بهرنیو چارو وزیرانو دا نوی پروګرام نن په برلین کې اعلان کړ.
دغه هیواد ژمنه کړې چې ۳۸ زره افغانان، په تېره بیا هغوی چې د طالبانو تر واک لاندې له خطر سره مخامخ دي، مني او شاوخوا ۲۶ زره افغانان له وړاندې جرمني ته رسول شوي دي.
د نوي پروګرام له مخې به د میاشتې زر تنه افغانان او د هغو د کورنیو غړي منل کېږي. په دې پروګرام کې په ځانګړي ډول هغه افغانان چې د طالبانو له لوري په نخښه کېږي په تیره بیا ښځینه فعالانې او د بشري حقونو دفاع کوونکي یا هغوی چې په څارنوالیو، قضا، عدلیې، سیاست، رسنیو، تعلیم، کلتور، سپورت او ساینس په برخو کې یې کار کاوه، جرمني ته بیول کېږي.
د دې پروګرام پر اساس هغه افغانان هم په جرمني کې منل کېږي چې د جنسیت، د درېیم جنسیت لرلو یا د مذهبي عقایدو کبله تعقیبېږي.
د جرمني د کورنیو چارو وزیرې ننسي فیسر په یوه بیان کې وویل:«د څرګند کړای شویو مشخصاتو له مخې، موږ د افغانستان هغو کسانو ته پناه ورکوو چې له خطر سره مخامخ دٍي.»
د نوي پروګرام پر اساس یوازې هغه افغانان په جرمني کې منل کېږي چې په افغانستان کې اوسي. تر دې مخکې جرمني په ځانګړي ډول له پاکستان څخه افغانان منل.