تاند:( يکشنبه،د سنبلې اووه ويشتمه) د افغانستان په چارو کې د روسیې ځانګړي استازي ضمیر کابلوف خبرداری ورکړی چې د افغانستان اوسنی اجتماعي او اقتصادي وضعیت د چریکي بريدونو په نسبت طالبانو ته ډېر ننګونکي دي.
نوموړي په یوه تازه مرکه کې ویلي،چې د دغه وضعیت دوام افغانان د طالبانو خلاف اعتراضونو ته اړ باسي.
د روسیې ځانګړي استازي له دغه وضعیت څخه د وتو لپاره په افغانستان کې د ټول ګډونه حکومت جوړیدل لومړنۍ اساسي اړتيا ګڼلې ده.
د هغه په وينا، يوازې روسېه نه بلکې پاکستان،ايران، هند او د سیمې ډېر هېوادونه په افغانستان کې د ټولو قومونو او سیاسي لوریو په ګډون د يوه حکومت د جوړیدو غوښتونکي دي.
ضمیر کابلوف د دې پوښتنې په ځواب کې،چې طالبان خو خپله اداره ټول شموله حکومت بولي، وويل: په دې برخه کې موږ قناعت نه لرو.
څو ورځې مخکې د ازبکستان په سمرقند کې د شانګهای سازمان په سرمشریزه غونډه کې هم له طالبانو څخه په افغانستان کې د ټول ګډونه حکومت د جوړولو غوښتنه وشوه.
پرون د اتریش په ویانا ښار کې د افغانستان يو شمېر سياسي څېرو،چې د طالبانو خلاف د يوې جنګيدونکې سياسي ډلې مشر احمد مسعود هم پکې شامل و، په افغانستان کې د سياسي مذاکراتو له لارې د ټول ګډونه حکومت غوښتنه وکړه.