تاند:( چار شنبه،د سنبلې درويشتمه) د ننګرهار لپاره د طالبانو د ادارې والي حاجي ملا محمد نعيم اخند او د دوی د ترانسپورت وزارت مرستيال صديق الله عابد د ليدنې پر مهال ويلي، چې ډېر ژر به په تورخم کې صفري نقطې ته د مسافرينو لېږد د بسونو په واسطه پيل کړي.
ملا صدیق زیاته کړې، چې مسافرين به له ترمينل څخه صفري نقطې ته انتقاليږي، چې په دې سره به د ګڼې ګوڼې او بې نظمۍ مخنيوی هم تر سره شي.
هغه زياته کړه، چې ډېر ژر به د دې ولايت ټولو لويو تم ځايونو کې د ۴۹ کسانو په ګمارنې سره ترانسپورتي چارې منظم کړي، چې ور سره به عوايد هم زيات شي.
د طالب مقام په وینا، مسافرينو ته يې په ټولو تم ځايونو کې لازم تدابير هم په نظر کې نيولي دي.
د ننګرهار لپاره د طالبانو د ادارې والي حاجي ملا محمد نعيم اخند د دوی له ترانسپورت وزارت څخه غوښتنه يې وکړه ترڅو مسافرينو په ځانګړي ډول ناروغانو ته لازم سهولتونه رامنځته شي.
د پاکستان منتقدین بيا وايي،چې په تورخم کې د ورته خدماتو د زیاتیدو تر شا دغه هېواد لاس لري،ځکه د سرحدي خدماتو له بنسټي کیدو سره غواړي دغه تحمیل شوې صفري نقطه د يوه رسمي سرحد په بڼه واوړي.