تاند:( چار شنبه،د سنبلې درويشتمه) د افغانستان لپاره د اروپايي ټولنې ځانګړي استازي توماس نیکلاسون ویلي،چې د افغانستان پر خاورې د طالبانو حاکمه اداره له دغې ټولنې سره د تعامل په شرایطو نه ده برابره شوې.
نوموړي له شپږم ټولګيو څخه د نجونو د پورته ښوونځيو پرانيستل، دندو ته د ښځو ستنیدل، د بشري حقونو د تامين تضمین او داسې نور موارد چې ډېری افغانان او نړیواله ټولنه ېې له طالبانو څخه عملي کیدل غواړي، له دغې ډلې سره د اروپايي ټولنې د تعامل اصلي شرايط ګڼلي دي.
مخکې د اروپايي ټولنې د بهرني سياست مسوول جوزب بورل له طالبانو سره د تعامل په کیدو ټینګار کړی و،خو شرط ېې دا و چې طالبان به د دغې ټولنې له لوري وضع شویو شرايطو ته غاړه ږدي.
طالبانو د اروپايي ټولنې د استازي څرګندونو ته غبرګون نه دی ښودلی،خو ویلي یې دي چې د ښوونځيو د پرانيستلو په ګډون نور موارد ټول د دوی د صلاحیت اړوندې پریکړې دي.
افغان څارونکي انديښمن دي،چې د طالبانو دغه سرزوري،چې ممکن د دوی د تر ټولو ستر ملاتړي پاکستان لاس به پکې وي، د طالبانو اداره نوره هم منزوي او ورسره په افغانستان کې بشري ناورين نور هم پراخ کړي.