تاند( چار شنبه ، د اسد ۱۹ مه) په تخار کې ځایي سرچينو پر یوې ښځې د ګلزار ګجر په نوم د يوه طالب قوماندان د جنسي تیري خبر ورکړی.
۸صبح ورځپاڼې د خپلو سرچينو په حواله ویلي،چې ياد شوی قومندان يوه کور ته د پلټنې په پلمه ورغلی او د دې عمل مرتکب شوی.
سرچينه زياتوي،چې له دې پېښې وروسته خلک خبر شوي او د طالبانو تر منځ خپلمنځي اختلافات رامنځته شوي دي.
طالبان له پرزول شوي جمهوري نظام سره خپل يو لوی توپير د مالي او اخلاقي فساد خلاف مبارزه ګڼي او د اخلاقي فساد په تور يې د ګڼو کسانو د علني او صحرايي مجازاتو خبر ورکړی.
په دې لړ کې طالبانو د خپلو ځینو اړوندو کسانو د مجازاتو په اړه هیڅ نه دي ويلي،چې په ورته فسادونو تورن شوي.