تاند( يکشنبه ، د اسد ۱۶ مه) د کابل د امنیې قوماندانۍ لپاره د طالبانو ویاند خالد ځدراڼ وايي چې امنیتي ځواکونو يې په پغمان ولسوالۍ کې یو تن د انسان تښتوونکو له منګولو آزاد کړی او په تړاو یې درې تنه نیول شوي دي.
بل لور ته:په زابل کې د طالبانو ځايي چارواکي وايي چې د دغه ولایت په شاه جوی ولسوالۍ کې امنیتي ځواکونو يې یوه نجلۍ د انسان تښتوونکو له منګولو خلاصه کړې او په تړاو یې یو تن نیول شوی دی.
په وروستيو کې د افغانستان له مختلفو ولايتونو څخه د انسان تښتونې د پېښو او هم د تښتونکو له منګولو د تښتول شویو کسانو د خلاصون خبرونه زیات شوي.
د اقتصادي او بشري ناورين شدت او د جرمونو د مخنيوي لپاره د مسلکي کادرونو تشه د دغه وضعیت له اصلي لاملونو څخه ګڼل کیږي.