تاند(یکشنبه، د اسد ۱۶مه) له کونړ څخه ترلاسه شوي راپورونه وايي، د دغه ولایت د دانګام ولسوالۍ په بین شاهي سیمه کې د پاکستاني پوله ساتو او افغان طالب ځواکونو ترمنځ نښته شوې ده.
سرچینې وايي، نښته نن مازدیګر وروسته له دې ونښته چې پاکستاني ځواکونو د کونړ ولایت په خاوره کې پوستې جوړولې او ازغن سیم یې غځاوه او طالبانو پرې غبرګون وښود.
د طالبانو حکومت او پاکستان تراوسه پورې د دې نښتې په اړه رسماً څه نه دي ویلي.
پاکستان په ډیرو سیمو کې له ډیورنډ کرښې د افغانستان خوا ته اغزن سیمونه نصب کړي او په ځلونو پاکستاني پوځیان د کرښې په اوږدو کې د ولسي خلکو له غبرګون سره مخامخ شوي دي.
د سیمې یوه اوسېدونکي ذبیح الله تاند ته د وټس اپ له لارې وویل چې مازدیګر شاوخوا ۵ بجې پاکستاني پوځیانو د بین شاهي په ساحه کې د پوستې د جوړولو او د سیم د غځولو کار پیل کړ خو طالبانو یې په کلکه مخالفت وکړ چې په نتیجه کې د دواړو خواوو ترمنځ جګړه پیل شوه.
د سیمې یوه بل اوسېدونکي، چې نه یې غوښتل نوم یې واخیستل شي، تاند ته وویل چې پاکستان له یوې اوونۍ راهیسي د کونړ په خاوره کې د پوستو او دېوال د جوړولو کار پیل کړی و.
ذبیح الله وايي چې طالب ځواکونه وتوانېدل چې د پاکستاني پوځیانو د اقدام مخه ونیسي خو پاکستاني پوځیانو د کونړ د دانګام ولسوالۍ پر قاسم، تبیله او سورکمر سیمو د توپونو او هاوانونو بریدونو ته دوام ورکړ.
طالبانو هم متقابلې ډزې کړي او جګړې تر یو ساعت مخکې پورې دوام درلود.
وروستي راپورونه وايي چې جګړه درېدلې ده.
دا د ايمن ظواهري د وژنې وروسته راپورته شوي وضيعت څخه د خلکو د پام اړولو هڅه ده.