تاند (پنجشنبه، د تلې/ میزان ۹ مه) د روسیې د بهرنیو چارو وزیر سرګي لاوروف به د میزان په ۱۳مه په مسکو کې د افغانستان په اړه د «مسکو فارمټ» غونډې په څنډه کې د افغانستان د واکمنې ادارې له بهرنیو چارو وزیر سره وویني.
د روسي رسنیو د چهارشنبې د ورځې د راپور له مخې، په دې غونډه کې به د افغانستان، هند، ایران، قزاقستان، چین، قرغیزستان، پاکستان، تاجکستان، ازبکستان او روسیې استازي او جګپوړي چارواکي ګډون وکړي.
د روسیې د بهرنیو چارو وزارت ویاندې ماریا زاخارووا د چهارشنبې په ورځ وویل چې لاوروف به د غونډې په پیل کې وینا وکړي او د طالبانو د پلاوي مشري به د افغانستان د بهرنیو چارو وزیر امیرخان متقي کوي.
د زاخارووا په وینا، د روسیې او افغانستان د بهرنیو چارو وزیران به په جلا لیدنه کې د دوهاړخیزو همکاریو په اړه خبرې وکړي.
روسیه یوازینی هیواد دی چې د افغانستان د طالبانو حکومت په رسمیت پېژني.
روسیه وايي، د «مسکو فارمټ» په غونډه کې به له افغانستان سره د سیمې د هېوادونو د سیاسي او اقتصادي همکاریو، د ترهګرۍ پر وړاندې د مبارزې او د نشهیي توکو د قاچاق د مخنیوي موضوعات هم وڅېړل شي.
د روسیې د بهرنیو چارو وزارت ویاندې وویل، ټاکل شوې چې د غونډې په پای کې یوه ګډه اعلامیه هم خپره شي.