تاند( جمعه ، د اسد ۱۴ مه) د کابل ښار د شپږمې حوزې اړوند په سر کارېز کوڅه کې د اهل تشيعو پر مذهبي مراسمو د چاودنې له امله لسګونه تنو ته مرګ ژوبله اوښتې ده.
د کابل د امنیې قومندانۍ لپاره د طالبانو ویاند خالد ځدراڼ وايي،چې دغه چاودنه په يوه کراچۍ کې د ځای پر ځای شویو چاودېدونکو توکيو د چاودنې له امله شوې ده.
هغه زياتوي:« په یاده پېښه کې زموږ «۸» تنه ولسي وګړي شهیدان او «١٨» تنه نور ژوبل دي چې د ځینو زخمیانو حالت نازک دی.»
دغه طالب وياند دا هم ویلي،چې امنیتي ټیمونه د پېښې د عاملینو د موندلو لپاره په هڅو بوخت دي.
د پېښې مسووليت چا پر غاړه نه دی اخیستی.
عیني شاهدانو د پېښې د مرګ ژوبلې کچه لوړه ښودلې ده.
دا په داسې حال کې ده،چې طالبانو د محرم د لسمې په مناسبت د خاصو امنيتي تدابيرو خبر ورکړی و.