تاند( شنبه ، د اسد لومړۍ ) د افغانستان لپاره د ایران ځانګړي استازي کاظمي قمي پاکستان ته د سفر پر مهال د دغه هېواد د بهرنيو چارو وزير بلاول بوټو زرداري سره د افغانستان د وضعيت په اړه خبرې کړي.
نوموړي په خپله ټویټر پاڼه کې لیکلي، چې له ترهګرۍ سره مبارزه، په افغانستان کې د ټولو قومونو په ګډون د دولت جوړول، په افغانستان کې امنيت او پراختيا او د افغانستان په محوریت په سیمه کې د پایداره او تلپاتې فضا رامنځته کول د دغو خبرو اصلي محورونه وو.
د ایران استازي دا هم ویلي، چې د افغانستان په برخه کې د دوی او پاکستان ترمنځ د همکارۍ زمینه موجوده ده.
د ايران دغه مقام په ورته وخت کې ویلي، چې دواړو لوريو د افغانستان په اړه د تاشکند د کیدونکې غونډې په اړه هم خبرې اترې کړي دي.
ايران، پاکستان، ګڼو نورو هېوادونو او تر هر چا ډېر خپله افغانانو په ځلونو په افغانستان کې د ټول شموله حکومت د جوړیدو او په خبرو د ستونزو د حل غوښتنه کړې، خو طالبان ټينګار کوي، چې د دوی حکومت ټول شموله او د ټولو استازی دی.