تاند(دوشنبه، د سرطان ۲۷ مه) د کراچۍ د ونډو په بازار کې د امریکایي ډالر پر وړاندې د پاکستانۍ روپۍ ارزښت په بې ساري ډول ولوېد.
نن یو امریکایي ډالر د بانکونو د داخلي نرخ په اساس په ۲۱۵.۲۵ روپیو تبادله شو او دغه لړۍ په چټکۍ سره مخ پر ځوړي روانه ده.
په ورته وخت کې، په ازاد بازار کې د یوه ډالر قېمت ۲۱۷ روپیو ته رسېدلی او مخ پر ښکته روان دی.
د پاکستان جیو نیوز تلوېزیون وېب سایټ لیکلي چې د ورځې له پیل نه د ورځې تر نیمایي پورې د یوه ډالر په قېمت کې ۴،۳۰ روپۍ توپیر راغلی خو دا لا معلومه نه ده چې د ورځې تر پایه به دا نرخ څو ته ورسېږي.
کارپوهان وایي، د ډالر په قېمت کې د هرې یوې روپۍ په ډېرېدلو سره د بهرنیو سودي پورونو په لړ کې دغه هېواد ته ۱۳۷ میلیارده روپۍ (څه باندې ۶۵۰ میلیونه ډالر) تاوان ور رسیږي چې په دې حساب یوازې نن یې د بهرني پور اندازه له دوه نیم میلیاردو ډالرو څخه ډېره زیاته شوې ده.
پاکستان د خپل اقتصاد او روپۍ د ارزښت د ژغورلو لپاره هر لوی او واړه بوټي ته لاس ور اچوي، او له همدې امله یې هڅه کوله چې د افغانستان کنګل شوې شتمنۍ راخلاصې کړي او د خپل اقتصاد د ژغورلو لپاره یې د نړۍ والو بانکونو پرځای په خپلو بانکونو کې ذخیره کړي، او د روپۍ ارزښت پرې وساتي خو بریالي نشول.
دغه هېواد اوس په کلدارو د افغانستان د ډبرو سکرو په پېرودلو ټینګار کوي، او که په خپل دې هدف کې بریالي شي، ګټه یې یوازې پاکستان او تاوان یې سراسر افغان ولس او سوداګرو ته رسېږي.
لکه چه امارت اسلامی ورسره په کلدارو د سکرو پلورل و نه منل ، پاکستان ته د خپلو پیسو د ثبات لباره افغانستان او امریکی کومکونو ته امید پاتی وو .