تاند( چارشنبه ، د سرطان پینځلسمه ) د افغانستان د ملي امنیت وروستني لوی رييس احمد ضياء سراج خبرداری ورکړ، چې د افغانستان له بې نظامه کیدو څخه وروسته د سیمې د نورو هېوادونو د اوسنيو نظامونو ړنګول د اسلامي افراطي ډلو ګډه اجنډا ده،چې طالبانو توافق ورسره کړی.
نوموړي د افغانستان د نظام له ړنګیدو وروسته په لومړنۍ تلويزوني مرکه کې چې له بي بي سي فارسي سره ېې وکړه، دا څرګندونې وکړې.
هغه د پاکستان، ازبکستان ، تاجيکستان او يو شمېر نورو سیمه ییزو هېوادونو د اړوندو وسله والو افراطي ډلو یادونه وکړه،چې له کلونو راهيسې د افغانستان له واکمنو طالبانو سره نیږدې اړیکې لري او د دوی تر چتر لاندې ېې په افغانستان کې پټنځايونه او فعاليتونه لرل.
د افغانستان د ړنګ شوي ملي امنیت ځواک دغه وروستی رییس زیاتوي،چې يادو ډلو او طالبانو ټولو توافق سره کړي و،چې د خپلو هېوادونو د نظامونو په ړنګیدو کې به همکاري ورسره وکړي.
د احمد ضياء سراج په وینا،اوس چې افغانستان بې نظامه شوی،طالبان پکې حاکم شوي او د دوی تر چتر او ملاتړ لاندې د سیمې نور افراطي جريانونه په افغانستان کې فعاليت کوي،د سیمې د نورو نظامونو لپاره خطر موجود دی.
د سراج په وينا،پر سيمه ييزو افراطي جريانونو سربېره نړيوال افراطي جريانونه لکه القاعده او نور هم په افغانستان کې بيرته په ډاډمنه توګه فعال شوي او سيمې ته د خطړ زنګونه دي.
دا په داسې حال کې ده،چې پرون د ازبکستان د بهرنیو چارو وزارت د افغانستان له خاورې پر دغه هېواد د پينځو توغندیزو بریدونو خبر ورکړی.
د طالبانو چارواکو په دې اړه څه نه دي ويلي.
مخکې طالبانو په پرله پسې ډول ټينګار کړی،چی د افغانستان خاوره به د هيڅ کوم هېواد خلاف نه کارول کېږي.