تاند( یکشنبه، د جوزا ۲۹ مه) د افغانستان لپاره د بریتانیا د سفارت شارژدافیر «هوگو شورتر» وايي، چې هېواد ېې د جګړې له لارې په افغانستان کې د سياسي بدلون د هڅو ملاتړ نه کوي.
نوموړي په تازه څرګندونو کې ويلي، چې هېواد ېې له خپلې خاورې څخه په افغانستان کې د تاوتریخوالي لپاره د هڅو اجازه نه ورکوي.
د هغه په خبره، تاوتریخوالی نه د افغانستان او نه د نړیوالې ټولنې په ګټه دی.
بريتانوي شارژدافیر په عین حال کې ویلي، چې د طالبانو حکومت سره عملي تعامل د وخت اړتیا ده او له دې تعامل سره په افغانستان کې د سولې او ثبات، بشري مرستو او امنيتي انديښنو په اړه کار کیدای شي.
هغه ټينګار کوي، چې طالبانو سره له تعامل پرته د دې اهدافو د تعقیب لپاره بل کوم بدیل نه ليدل کېږي.
د بریتانیا شارژدافیر یادې څرګندونې په داسې حال کې کړي، چې د افغانستان په چارو کې د روسیې د ولسمشر استازي ضمیر کابلوف څو ورځې مخکې له نوم اخیستو پرته لویدیز هېوادونه په افغانستان کې د قومي او کورنۍ جګړې په هڅولو تورن کړل.
طالبانو تر اوسه د دواړو دغو بهرنيو ديپلوماتانو د څرګندونو په اړه څه نه دي ويلي.