تاند( جمعه، د جوزا ۲۷ مه) د پنجشېر ولايت د شتل ولسوالۍ په آرزو دره کې پرون د طالبانو اړونده يوه چورلکه سقوط شوې، چې د پنجشېر مقاومت ډلې او طالبانو يې په اړه بېلابېلې ادعاوې کړي دي.
د طالبانو د دفاع وزارت يوې سرچينې ويلي، چې چورلکه یې په ياده سيمه کې له اوو سپرليو سره سقوط شوې.
سرچينه وايي، چې د طالبانو ځواکونه سیمې ته رسیدلي، څو خپل کسان وژغوري.
د پنجشېر د مقاومت ډلې بيا ادعا کړې، چې چورلکه دوی سقوط کړې او ۴ سپرلۍ یې یرغمل نیولي.
طالبانو نه دي ویلي، چې چورلکه خپله نسکوره شوې که د پنجشېر مقاومت ډلې سقوط کړې ده.
طالب چارواکو د مقاومت ډلې له لوري د چورلکې د سپرلیو یرغمل کیدل رد کړي دي.
د پنجشېر له شتل ولسوالۍ څخه د طالبانو او پنجشېر مقاومت ډلې د نښتو راپورونه هم ورکړل شوي.
سرچینې وايي، چې نښتې د پنجشېر ډلې پر ضد د طالبانو له بريدونو وروسته پيل شوي.
د دغو نښتو په اړه ډېر جزییات نه دي تر لاسه شوي.