تاند( سې شنبه، د جوزا ۲۴ مه) د ملګرو ملتونو د خوړو او کرنې سازمان ویلي، چې نړيوال بانک له افغان کروندګرو سره یو نیم سل میلیونه امریکایې ډالره مرسته کوي.
د دغه سازمان په حواله، دا مرسته د غذايي موادو د تولید او اوبو د سرچينو د زیاتېدو لپاره لګول کیږي.
ويل شوي، چې د مرستې ډېر تمرکز به د غنمو د تولید د سرچينو په زياتوالي وي.
د ملګرو ملتونو د خوړو او کرنې سازمان څه موده مخکې انديښنه څرګنده کړه، چې افغانستان د غنمو خورا کمښت سره مخامخ دی.
د سرچينې په حواله، سږ کال د پخوا په نسبت د افغان کروندګرو له لوري د غنمو په کرکيله کې ۷۱ سلنه کمښت راغلی.
د راپور له مخې، ۷۹ سلنه کروندګر د خپلو کرلو فصلونو د حاصلاتو څرنګوالي ته انديښمن دي.
دا په داسې حال کې ده، چې د غنمو کمښت په يوې نړيوالې ستونزې بدل شوی او له څو مياشتو راهيسې پاکستان ته د افغانستان د غنمو د قاچاق خبرونه ورکړل شوي.