تاند(پنجشنبه، د جوزا ۱۹ مه) د طالبانو د کورنیو چارو وزارت مرستيال مولوي نور جلال جلال وايي، چې د طالبانو ۵۰ زره پوليس ځواکونو په لنډ مهاله پروګرامونو کې مسلکي او تخنيکي زده کړې ترلاسه کړي دي.
نوموړي پرون په یوه خبري غونډه کې دغه راز ویلي، چې د یونیفورم له بشپړیدو سره به د نا مسووله کسانو له لوري د دغه یونیفورم کارول په جدي ډول منع شي.
دا په داسې حال کې ده، چې له تېرو نهو مياشتو راهيسې د طالبانو ډېری ځواکونه په شخصي لباسونو کې د خلکو په امنیت ساتلو بوخت وو.
سربېره پر دې، د رسمي یونیفورم د نشتوالي له امله ډېر ځله د طالبانو د ځواکونو له لوري یو شمېر جرمونه هم تر سره شوي دي.
د طالبانو کورنيو چارو وزارت پرون وویل، چې عمومي مشر ېې د دوی د پوليسو نوی یونیفورم منظور کړی او تر راتلونکو دوو اونیو به ېې ۲۰ زرو پوليسو ته په کابل او کندهار ولايتونو کې دغه یونیفورم ووېشل شي.
نظامونه به تغییر کوي ، حکومتونه او دولتي چارواکي به خپل ځایونه نورو ته پرېږدي، خو ځینې ارزشونه لکه نظامي او عسکري قطعې ، سربازان ، ملي بیرغ ، اساسي قانونه ، ملي سرود ، دولتي ادارې ، پاسپورتونه ، کرنسي یا اسعار او د هېواد دفاعي ځواکونه په ملت پورې اړه لرې . هغوی باید د تل لپاره وساتل شي .
د یونیفورم تغییر او تبدیل دې خوار ملت ته ډېر دروند تمامیږي .