تاند(یکشنبه، د جوزا ۱۵ مه) په لغمان کې د غصب د مخنیوي لپاره د طالبانو جوړ شوی کمېسیون وايي، چې د دغه ولايت د د قرغیو ولسوالۍ زعفرانو دښتې سیمه کې۲۰ زره جریبه ځمکه له غصبه خلاصه کړه.
باختر اژانس د لغمان د مرستیال والي له خولې وايي، ټاکل شوې چې په یاده ځمکه کې د بڼوالۍ، چرګانو، ګلانو او د ماهیانو فارمونه جوړ شي، چې شاوخوا ۴۰ زرو کسانو ته به په کې د کار زمینه برابره شي.
طالبانو د ادعا شویو پرمختيايي کارونو په اړه څه نه دي ويلي.
په وروستيو کې د طالبانو چارواکو په مختلفو ولايتونو کې رسنيو ته د ورته پروژو خبرې کړي، خو د طالبانو ځینې منتقدین او خبريالان داسې څرګندونو ته د تبليغاتي هڅو په سترګه ګوري.
د طالبانو د بهرنيو چارو وزير مولوي امیرخان متقي څو ورځې مخکې د طالبانو له مطبوعاتي مبلغينو او وياندويانو سره د دوی د تبلیغاتو په پراخولو په اړه غونډه او سپارښتنې کړې وې.