تاند(یکشنبه، د جوزا ۱۵ مه) د طالبانو حکومت اعلان کړی، چې د جمهوري نظام د دفاع وزارت متقاعد شوی وياند جنرال دولت وزیري د دوی په بلنه هېواد ته ستون شوی.
طالبانو د نوموړي د ستنیدو عکسونه هم خپاره کړي، چې له وړې ږيرې او سپين پکول سره پکې ښاغلی وزیري له طالب چارواکو سره لیدل کیږي.
جنرال وزیري د داود خان د جمهوري نظام له ضابطانو څخه و، چې پر نوموړي د کمونيست پلوه ګوند په کودتا او وروسته یې پر ډاکټر نجيب د شهنواز تڼي په کودتا کې هم ونډه لرله.
ښاغلي وزیري شاوخوا کال وړاندې د یک ټلویزیون په کاکتوس خپرونه کې ویلي وو، چې د ډاکټر نجيب خلاف یې د شهنواز تڼي په مشرۍ د کودتا له ناکامیدو وروسته څه موده بند تېر کړ او له خوشې کيدو سره سم د رباني جميعت ګوند ته تسليم او ورسره ملګری شوی و.
جنرال وزیري د دفاع وزارت له ویاندۍ څخه تر تقاعد کیدو وروسته د ولسمشر غني د « دولت جوړونکي» ټاکنيز ټیم له وياندويانو څخه هم و او طالبانو سره په سوله کې ېې د دفاعي او امنیتي ځواکونو په سر په نه معاملې ټینګار درلود.
د یادونې وړ ده، چې د دفاع وزارت یو بل پخوانی ویاند غفور احمد جاويد هم څه موده مخکې له یوه ګاونډي هېواد څخه بیرته کابل ته ستون شوی و، خو طالبانو یې د ستنیدو خبر نه و رسنيز کړی.
مبارک مبارک.
دا ګړی خو دوو باجه ګانو ( د مَلَک بازو زومانو ) یو بل سره وموندل. ممکن نور باجه ګان هم سره ومومی.