تاند(جمعه، د جوزا ۱۳ مه) د طالبانو د امر بالمعروف او نهی عن المنکر وزارت په هرات کې پر ښځینه خیاطانو د کارونو بندولو خبرونه رد کړل.
د دې وزارت ویاند محمد عاکف مهاجر ويلي، چې دوی د هرات ښځینه خیاطانو ته د کار بندولو په اړه څه نه دي ويلي، خو نارینه خیاطانو ته ېې امر کړی چې د ښځينه مشتریانو د لباسونو اندازه ( ناب) به نه اخلي.
له پرون راهيسې هرات نه خبري سرچينو پر ښځینه خیاطانو د طالبانو له لوري د کار بنديز خبر ورکړی، چې د خلکو توند غبرګون سره مخ شوی.
د طالبانو د حکومت پر امر بالمعروف وزارت له پیله نیوکه ده، چې د ښځو د وزارت پر ځای يوازې همدې ته تاسيس شوی څو ټولو خلکو او په خاص ډول د ښځو ژوند او فعاليتونو ته مزاحمتونه وکړي.
خپله د طالبانو یو شمېر چارواکي او منسوبین هم د امر بالمعروف وزارت له ډېرو قيوداتو سره مخالف ښکاري، خو د طالبانو رييس الوزرا ملا محمد حسن اخند په يوه حکم کې ټولو ادارو ته امر کړی، چې په هيڅ صورت د دغه وزارت له پريکړو سرغړونه ونه کړي.
امر بالمعروف وزارت، چې د طالبانو د حکومت تر ټولو با صلاحيته او د عامو خلکو په اصطلاح « پر مزاحمته» ارګان دی، په وزارتونو او ولايتونو کې د رياستونو او په نورو ادارو کې د آمریتونو او مديریتونو په کچه تشکیلات لري.
دغه وزارت ان په خصوصي پوهنتونونو کې خپل مديریتونه ایجاد کړي او کارکوونکو ته ېې د اقتصادي ناورين له کبله پر مخ په زوالو پوهنتونونو معاشونه ورکول جبري کړي دي.