تاند(سې شنبه، د ثور ۲۰ مه) سره له دې چې د طالبانو د مرکزي حکومت ویندویان په پنحشېر او نورو ولایتونو کې د نښتو په اړه د خپلو وسله والو مخالفانو ادعاوې چورلټ ردوي، د طالبانو د حکومت د پنجشېر ولایتي ادارې تایید کړه چې په دې ولایت کې یې شپږ وسله وال د مخالفو جګړه مارو په حملو کې وژل شوي دي.
د افغان اسلامي اژانس د راپور له مخې، د پنجشېر ولایت د والي ویندوی ابوبکر صدیق پرون/ دوشنبه وویل چې په دره ولسوالي کې د جمعې د ورځې په جګړه کې د دوی ۶ وسله وال کسان وژل شوي او ۲ نور ژوبل شوي دي.
تر دې مخکې وړمه ورځ د مقاومت ملي جبهې د پنجشېر په درې او ابشار ولسوالیو کې له طالبانو سره په مخامخ نښتو کې د ۲۰ وسله والو طالبانو د وژل کېدو او شپږو نورو د ټپي کېدو ادعا کړې چې طالبانو هغه ردکړې وه.
له دې پېښې وروسته طالبانو یو شمېر مشکوک کسان نیولي دي.
خو مخالفه جبهه وايي چې طالبانو ملکي وګړي نیولي دي.
د جرمني د ډي پي اې خبري آژانس د راپورله مخې، د مقاومت د ملي جبهې یوه ویاند علي میثم نظري ادعا کړې چې طالب ځواکونو وروسته له هغې چې ورته ډېرې مرګ ژوبلې واوښتې او پریو شمېر سیمو یې کنټرول له لاسه ورکړ، د پنجشېر په ابشار او عبدالله خېل سیمو کې تر سلو زیات ملکیان نیولي او لږ تر لږه ۹ تنه نور یې وژلي دي.
خو په پنجشېر کې د طالبانو د والي ویاند ابوبکر صدیق د ملکیانو د وژلو ادعا رکړه خو دا یې تایید کړه چې د پنجشېر ولایت په درې ولسوالۍ کې یو کم شمېرمشکوک کسان وروسته له هغې ونیول چې په دې سیمه کې د دوی پر ځواکونه برید وشو.
د احمدمسعود په مشرۍ د مقاومت جبهه په وروستیو کې د طالبانو پر ضد د جګړو او هغو ته د مرګ ژوبلو د اړولو پر له پسې ادعاوې کوي.
دې جبهې د ځینو سیمو د نیولو ادعا هم کړې ده خو دا ادعاوې په خپلواک ډول تایید یا رد شوي نه دي.
طالبانو په پنجشېر، تخار او بغلان کې د نښتو خبرونه پر له پسې رد کړي او ویلي چې هیڅ راز جګړه نه ده شوې.
د طالبانو، د هغو د مخالفو ډلو او تر یوه حده د سیمې د اوسېدونکو له څرګندونو داسې ښکاري چې جګړو سر راپورته کړی خو لا په خورا ابتدايي پړاو کې دي.
د طالبانو افراطي اقداماتو او ورسره لوږې او بې روزګارۍ د خلکو نارضایتي ډېره کړې او دې مسلې د داعش په شمول د طالبانو ټولو وسله والو مخالفانو ته د فعالیت زمینه برابره کړې ده.