تاند:( يکشنبه، د ثور يوولسمه) د خوست په علي شېرخېلو ولسوالۍ کې د درنو چاودنو خبر ورکړل شوی.
ځايي سرچينو ويلي، چې چاودنې د ولسوالۍ په مقام کې وې، خو د طالبانو ځايي چارواکو بيا ويلي چې د علي شېرخېلو ولسوالۍ د سرحدي لېوا په ډیپو کې اور لګېدلی و.
د طالبانو ځايي سرچينو دا هم ويلي، چې سیمې ته د اور وژنې عملیاتي ډلې رسیدلي دي.
تر اوسه د دې چاودنو او ممکنه تلفاتو او نورو زیانونو په اړه یې رسنیو ته څه نه دي ويل شوي.
د طالبانو رسمي وياندويانو په دې اړه څه نه دي ويلي.