تاند:( يکشنبه، د ثور يوولسمه) د طالبانو د حکومت رییس الوزرا او د هغه اقتصادي مرستیال پرون دواړو په ارګ کې د اختر د لمانځه پر مهال ویناوې وکړې.
د طالبانو رييس الوزرا ملا محمد حسن اخوند په خپله وینا کې د هېواد اقتصادي ناورين ته په اشارې وویل: دا د ۲۰ کلن اشغال نتیجه ده.
حسن اخوند دا هم وويل، چې حکومت یې ټول ګډونه او د الهي احکامو مطابق بشري حقونو ته ژمن دی.
د ملا حسن اخوند اقتصادي مرستیال ملا عبدالغني برادر بيا د طالبانو مخالفینو ته خبرداری ورکړ، چې له پوځي لارو خپلو موخو ته نه شي رسېدلای.
هغه په عین حال کې ونه ويل، چې مخالفینو ته یې له « پوځي لارې» پرته بل کوم انتخاب مخې ته پريښی، چې د هغې مطابق چلند ورسره وکړي.
ملا حسن اخوند په خپله وینا کې دا هم وويل، چې د طالبانو امارت د افغانستان د امنيت، ثبات او سوکالۍ لپاره بشپړ چمتووالی لري.
ښاغلي برادر اخوند د خپل دغه چمتووالي په اړه نور جزییات نه دي ورکړي.
دا څرګندونې په داسې حال کې دي، چې د جمهوري نظام د ځانګړو ځواکونو عمومي قومندان جنرال سمیع سادات له اختر وروسته د طالبانو خلاف د درنې جګړې اعلان کړی او ویلي، چې په دې برخه کې زرګونه پخواني امنیتي او دفاعي ځواکونه او سياستوال ورسره ملګري دي.
د طالبانو له بيا واکمنیدو وروسته د اختر لمونځ په داسې مهال ارګ کې شوی، چې له طالب چارواکو پرته د دوی له حکومته د باندې مشهورو طالب څېرو هم پکې ګډون نه درلود
د افغانستان پخوانی ولسمشر حامد کرزی، د حزب اسلامي ګوند مشر ګلبدين حکمتيار او د طالبانو نور مشهور ملاتړي یا ارګ کې لمانځه ته نه دي بلل شوي او یا بلل شوي، خو نه دي ورغلي.
کرزي او حکمتيار په خپلو کورونو کې د اختر د لمانځه مراسم ترسره کړي دي.