تاند:( يکشنبه، د ثور يوولسمه) د افغانستان بې واکه شوي ولسمشر محمد اشرف غني د کوچني اختر په مناسبت په خپل غږيږ فيسبوکي پيغام کې د هېواد پر وضعیت او حل لارو خپل نظرونه شريک کړل.
ښاغلي غني د قدرت په انحصاري ساتلو او بدو پایلو یې تم شو او ويې ويل: په یوه خطرناک تاریخي وضعیت کې یوو، که یې په ګډه حل نه کړو، ټول غرقیږو.
بې واکه شوي ولسمشر په هېواد کې د وروستیو تروریستي پېښو له يادولو سره وويل، چې څاه کیدونکی خپله څاه ته غورځي.
هغه د انفجار او انتحار مدرسو ته په اشارې زياته کړه، چې د دغو مدرسو شاګردان د خپلو استاذانو خیال هم نه ساتي او په وژلو یې لاس پورې کوي.
د ولسمشر غني اشاره په ډېر ګومان د طالبانو خلاف د جنګي ډلو فعاليتونو او هم وروستيو بریدونو ته وه، چې مختلفې ډلې یې په جوماتونو او عامه ځايونو کې کوي او د « جهاد» نوم ورباندې ږدي.
د ښاغلي غني په خبرو کې د افغانستان اقتصادي ناورين ته هم اشاره وه.
هغه وويل، چې له لوږې له وجې د خلکو د پښتورګو خرڅول ټولو ته خوا بدونکې ده.
پخواني ولسمشر دا هم وويل، چې د نجونو د زده کړو، د اوسني وضعيت د حل لپاره د ملي اجماع جوړول، د واک پر انحصار نه ټینګار او تاریخ نه زده کړه په کار ده.
طالبانو د بې واکه شوي ولسمشر محمد اشرف غني څرګندونو ته کوم غبرګون نه دی ښودلی.