تاند:( دوشنبه، د حمل ۲۲ مه) د افغانستان د فوټسال ملي لوبډلې پرون او نن د اسيايي هېوادونو په لومړنيو سياليو کې له تاجیکستان او ازبکستان هېوادونو څخه ماتې وخوړه.
دا سيالۍ د قرغیزستان په پلازمېنه کې تر سره شوې، چې ویل کیږي افغان لوبډلې پکې همدا دوه لوبې لرلې.
د افغانستان د المپيک ملي کمېټې او بدني روزنې رياست لپاره د طالبانو ټاکل شوي رييس انجنير نظر محمد مطمین په دې اړه په خپله ټويټر پاڼه کې خواشيني ښودلې او لیکلي:« زموږ تمه ورته زياته وه، لاملونه به يې څيړم ان شاء الله، کمزورياني به په نښه کوو او د ملي ټیمونو د قوي کېدو لپاره به په بېلابېلو حلارو غور کوو.»
د ورزشي چارو کارپوهان وايي، چې طالبانو له واکمنیدو سره د افغانستان ورزشکاران هم په رواني لحاظ سخت ځپل شوي او د بایلې یو اصلي دلیل یې ممکن همدا وي.
پرون له ننګرهار ولايت څخه په یوه راپور کې وويل شول، چې انجینر نظر محمد مطمئن د ننګرهار د ورزش آمر نور احمد حبيبي، چې د افغانستان د سوک وهنې ملي لوبډلې غړی او د ګڼو بهرنيو سیالیو ګټونکی و، له دندې ګوښه او پر ځای یې د طالبانو یو مطبوعاتي مبلغ عبدالسلام وزیر وال ټاکلی دی.
وزيروال د نوې دندې په اړه د مننې پیغام کې، پر خپله فیسبوک پاڼه لیکلي، چې د طالبانو د ادارې دفاع او ساتنه به کوي.