تاند:( شنبه، د حمل ۲۰ مه) د کندوز په کله ګاو سیمه کې له تاجیکستان څخه افغانستان ته د وارداتي برېښنا يوه پايه الوزول شوې ده.
په کندوز کې د طالبانو د استخباراتو د رياست وياند قاري انس ويلي، چې دا کار نا څرګندو کسانو کړی.
د هغه په وينا، په دې پېښه کې د بریښنا یوه پایه په نسبي ډول ویجاړه شوې، خو چا ته ځاني زیان نه دی اوښتی.
نوموړي د پېښې د عاملینو د موندلو لپاره د هڅو خبر هم ورکړی.
د طالبانو له واکمنیدو وروسته، هم د هېواد په مختلفو سيمو کې د وارداتي برېښنا د پایو د الوزولو څو پېښې رامنځته شوي، چې مسووليت يې چا پر غاړه نه دی اخیستی او عاملين یې نه دي نیول شوي.
د دې پېښې او پر بریښنا رسولو د اغېزو په اړه یې د افغانستان د برېښنا شرکت چارواکو څه نه دي ويلي.