تاند:(چارشنبه، د کب يوولسمه) د طالبانو د حکومت چارواکي وايي، چې ځواکونو یې په پروان کې د داعش ډلې له وسله والو سره نښته کړې ده.
د طالبانو په يوه اعلاميه کې راغلي چې نښته پرون مازيګر د پروان ولايت په مرکز چاریکار ښار کې شوې.
سرچینه زیاتوي، د نښتې په ترڅ کې یو داعش وسله وال وژل شوی، بل ټپي او درېيم یې نیول شوی دی. ويل شوي چې نیول شوي کس پر خپل جرم اعتراف کړی دی.
داعش ډله تر ډېره د داسې خبرونو په اړه مطبوعاتو ته څه نه وايي.
په وروستيو کې ملګرو ملتونو او یو شمېر هېوادونو په افغانستان کې د داعش ډلې د فعالیتونو د زیاتېدو ادعا کړې، خو طالبانو یې راپورونه بې بنسټه ګڼلي دي.