تاند:(چارشنبه، د کب يوولسمه) په نيمروز کې د طالبانو د حکومت چارواکي وايي چې ايران هره ورځ خپلې خاورې ته په ناقانونه توګه اوښتي کډوال دغه ولايت ته ستنوي.
په نيمروز کې د طالبانو د کډوالو چارو رييس مولوي صديق الله نصرت وايي، چې په دغو شړل شويو کډوالو کې ښځې او ماشومان هم شامل دي.
نوموړی له نورو هېوادوالو هم غواړي چې هېواد ته ستانه او د هېواد په ابادولو کې ونډه واخلي.
نصرت زیاتوي، چې د کډوالو نړيواله اداره خپلو اصلي سيمو ته د شړل شويو افغانانو په ستنولو کې د کډوالو چارو رياست سره مرسته کوي.
مخکې په ځينو راپورونو کې ايران ته د ورتلونکو افغانانو ورځينۍ کچه له درېیو تر پينځو زرو تنو ښودل شوی و.
ايران له دې کبله انديښمن دی او وېره ده، چې په روان پسرلي کې به د اقتصادي او نورو ستونزو له کبله له افغانستان څخه د کډوالو د وتلو لړۍ نوره هم چټکه شي.