تاند: ( چار شنبه ، د کب څلورمه)‏ ‏ ملګرو ملتونو سازمان په افغانستان کې د داعش د خراسان ډلې د ۴۰ زره جګړه‌ مارو د موجوديت خبر ورکړ.

 د ملګرو ملتونو سازمان د راپور له مخې، د داعش ډېری جنګیالي د جمهوري نظام د سقوط پر مهال د طالبانو له لوري د له زندانونو له ماتیدو سره خوشې شوي دي.

ملګرو ملتونو دا هم ويلي، چې امنيت شورا یې پر القاعدې او داعش د لګول شویو بندیزونو د څارنې لپاره یوه ډله ټاکلې ده.

طالبانو د ملګرو ملتونو دغه راپور په داسې مهال خپور کړی، چې تېره ورځ د طالبانو د بهرنيو چارو وزير مولوي امیر خان متقي پرون د ملګرو ملتونو د سرمنشي ځانګړې استازې مېرمن ديبورا لاينز سره د لیدنې پر مهال د ملګرو ملتونو د سرمنشي هغو څرګندونو ته توند غبرګون وښود، چې په افغانستان کې يې د ترهګریزو ډلو د فعاليتونو په اړه کړې وې.

متقي د م.م د سرمنشي وروستیو څرګندونو ته په اشارې چې په افغانستان کې يې د تخریبي ډلو کواښ مخ په زیاتېدو او د بیا منسجم کېدو په تړاو اندېښنې ښودلې دي، وویل چې هېڅ حقیقت ‏نلري.

طالب وزير زیاته کړه: افغانان دغه ډول څرګندونې تشویش اچوونکې، پارونکې او په سملاسي ډول د تخریبي ډلو هڅونه او ورته کمپاین بولي.

مولوي متقي دا هم ويلي، چې حکومت یې هیچاته اجازه نه ور کوي چې افغان خاوره د چا په ضرر استعمال کړي.