تاند: ( یکشنبه ، د دلوې اوولسمه) د طالبانو د حکومت مرکزي بانک په یوه تازه ګام کې پر صرافانو او د پيسو پر خدماتي مرکزونو تازه قیودات لګولي دي.
د نویو قیوداتو له مخې، که په کابل، هرات، کندهار او بلخ ولايتونو کې څوک د صرافۍ يا پولي خدمتونو د مرکز جواز اخلي، پنځوس میلیونه افغانۍ مالي سرچينې باید ولري.
په نورو ولايتونو کې د دغه کاروبار لپاره ۱۰ میلیونه افغانۍ مالي سرچينې شرط شوي دي.
سربېره پر دې بايد د یادو جوازونو د ترلاسه کولو لپاره مالي کاروباريان پینځه میلیونه افغانۍ افغانستان بانک ته په تضمين کې کیږدي.
ويل شوي، چې یادې پیسې به افغانستان بانک د مالي جوازونو د لغوه کیدو د غوښتنليک پر مهال بیرته مالي کاروباريانو ته ورکوي.
په تازه بدلونونو کې طالبانو د صرافۍ او پولي خدمتونو د جواز ترلاسه کولو د جواز لګښت ۲ لکه افغانۍ ټاکلې ده.
افغان صرافانو او د پولي خدمتونو شرکتونو تر اوسه تازه قیوداتو ته کوم غبرګون نه دی ښودلی دی.