تاند: ( یکشنبه ، د دلوې اوولسمه) د بې پولې خبريالانو نړیواله ټولنه وايي، چې طالبانو د کابل له نیولو وروسته تر اوسه ۵۰ خبریالان او رسنیز کارکوونکي نیولي او پلټنې یې ورڅخه کړي دي.
د دې ټولنې په یوه اعلامیه کې راغلي، چې د اريانا تلويزيون دوه کارکوونکي خو تېره اونۍ له دفتره تر وتو وروسته په داسې حال کې ونیول شول، چې د ياد شوي تلویزیون همکارانو یې له نيږدې ننداره کوله.
د بې پولې خبريالانو په حواله، ډېری خبریالان په کابل کې د ښځینه معترضانو د لاريونونو د خبري پوښښ پر مهال نيول شوي دي.
د خبریالانو له نیولو او بندیانولو سربېره پر طالبانو د بې پولې خبريالانو بل تور دا دی، چې خبریالان د دوی په خوښه د خبرونو خپرولو، بحثونو ته د مشخصو کسانو بللو او د طالبانو د نورو فرمايشونو منلو ته اړ باسي
يادې ټولنې په افغانستان کې د خبریالانو وضعيت د جدي اندیښنې وړ ګڼلی او د طالبانو چلند ېې غندلی.
طالبانو د بې پولې خبريالانو دغو څرګندونو ته غبرګون نه دی ښودلی، خو مخکې ېې د رسنيو پر وړاندې د خپل چلند دفاع کړې او ویلي، چې رسنۍ بايد د اسلامي او ملي ارزښتونو له مخې نشرات وکړي.