تاند: ( شنبه ، د دلوې شپاړسمه) د طالبانو د حکومت وياند ذبيح الله مجاهد وايي، چې په افغانیو د ډالرو د بدلون په برخه کې د مرکزي بانک د ناتوانۍ ادعا حقیقت نلري.
نوموړي په يوه اعلاميه کې ويلي، چې تر اوسه د ملګروملتونو یا کوم بل ادرس څخه مرکزي بانک ته پیسې نه دي ورکړل شوي، کنه مرکزي بانک بې له شکه د هرڅومره ډالرو د اخیستلو او د افغانیو دورکړې توان لري.
مجاهد زیاتوي، چې په دې اړه خپاره شوي شایعات سم نه دي.
تازه یو شمېر رسنیو ویلي وو، چې افغانستان بانک د ملګرو ملتونو د شاوخوا یو نیم سل میلیونه ډالرو د افغانۍ کولو لپاره کافي بانک نوټونه نه لري.
هغه څه، چې طالبان یې بې بنسټه ادعا ګڼي او وايي افغانستان بانک کافي افغاني بانک نوټونه په واک کې لري.