تاند: ( چار شنبه ، د دلوې ديارلسمه) د طالبانو د حکومت وياند ذبيح الله مجاهد د ګالوپ(Gallup) په نامه د هغې څېړنې پايلې رد کړي، چې وايي په افغانستان کې ۹۴ سلنه خلک له عذاب سره مخ دي.
مجاهد ويلي: موږ دا پروپاګند ردو، په افغانستان کې اوس جګړه او تلفات ختم شوي، خلک په ډاډ او آرام ژوند کوي، اقتصادي ستونزو لا له وړاندې شتون درلود؛ خو د طالبانو حکومت يې د مخنیوي په کار بوخت دی.
طالب وياند زياتوي: په خلکو کې د مایوسۍ بې اساس راپورونه خپرول د افغانستان د دښمنو او مغرضو کړیو کار دی.
د ګالوپ ادارې په اعلامیه کې راغلي، چې افغانستان د نړۍ په کچه تر ټولو خواشينی او خلکو ته یې له عذابه ډک هېواد دی.
د ياد شوي نړيوال بنسټ په څېړنه کې راغلي، چې له هرو څلورو افغانانو څخه درې تنه یې ۷۵ سلنه د خوړو د تامینولو وسه ېې نه لري.
سرچينې زياته کړې، چې له هرو ۱۰ افغانانو څخه ۶ تنه ېې د سرپناه د برابرولو له ستونزې هم ځوريږي.
مخکې ملګرو ملتونو د ۲۴ میلیونو افغانانو د شدید فقر خبر ورکړی و.