تاند: ( دوشنبه ، د دلوې یوولسمه) د طالبانو عامې روغتیا وزارت چارواکي وايي چې په تېرو ۲۴ ساعتو کې د کرونا ۶۱۵ مثبتې پېښې ثبتې شوې.
طالب وياند په دې اړه په يوه ويډيويي پيغام کې ويلي، چې تر ټولو ډېرې دغه پېښې ۱۸۳ په ننګرهار کې ثبتې شوې دي.
د هغه په وینا په یاده موده کې د کرونا ۳۰ ناروغان روغ شوي او ۵ نور مړه شوي دي.
د طالبانو د عامې روغتيا وزارت په دې اړه نور جزییات نه دي ورکړي.
دا په داسې حال کې ده، چې له څو ورځو راهيسې د هېواد په مختلفو سيمو کې د مالي او تجهيزاتي امکاناتو د نشتوالي له کبله د کرونا پر وړاندې د مبارزې د سلګونو مرکزونو د تړل کیدو خبرونه ورکول کېږي
پرون په کابل کې د کرونا پر وړاندې د افغانستان د تر ټولو ستر معالجوي روغتون ( افغان- جاپان) مسوولینو وویل، چې د دغه روغتون د کار د دوام تړون نه دی شوی او دا روغتون هم ممکن ژر وتړل شي.