تاند: ( دوشنبه ، د دلوې یوولسمه) راپورونه وايي، چې په جمهوري نظام کې د ننګرهار ولايت مقام ویاند عطاالله خوږياڼی نن په دې ولايت کې طالبانو نیولی او بندي کړی و.
د نوموړي د نیول کیدو دلیل نه دی روښانه شوی.
عطاالله خوږياڼي پر خپلې ټویټر پاڼې په دې اړه له جزيياتو پرته ویلي، چې ورته رامنځته شوې ستونزه حل شوې ده.
عطاالله خوږياڼي په وروستيو کې په ننګرهار ولایت کې خيريه فعاليتونه ترسره کول.
طالب چارواکو د نوموړي د نیول کیدو په اړه څه نه دي ويلي.
دا په داسې حال کې ده، چې نن د طالبانو د حکومت وياندويانو د ملګرو ملتونو هغه راپور رد کړ، چې ګواکې دوی تر سلو ډېر پخواني دولتي چارواکي وژلي دي.