تاند: ( پنجشنبه ، د دلوې اوومه) د افغانستان په اړه د ملګرو ملتونو د امنیت شورا د تېرې شپې په ځانګړې غونډه کې د امريکا متحده ايالاتو استازي پر طالبانو د ډېر نظارت او فشارونو غوښتنه وکړه.
امريکايي استازي وويل: افغان ښځې او نجونې بايد د ژوند په ټولو برخو کې حضور ولري.
په ملګرو ملتونو کې د متحده ايالاتو سفير د طالبانو له هغې ژمنې هرکلی هم وکړ، چې د مارچ په پای کې یې د ښځينه ښوونځيو د پرانيستل کيدو په اړه کړې ده.
له دې سره، امریکايي سفیر زیاته کړه چې پر طالبانو د نړیوالو نظارت او فشارونه باید زیات شي، څو د ژمنو عملي کیدو ته مجبوره شي.
د امريکا د سفير په وينا کې ټینګار وشو، چې که طالبان د افغانانو او نړیوالو ملاتړ تر لاسه کول غواړي، مدني ازاديو ته درناوی باید ومني.
د امريکا سفير دا نه ده روښانه کړې، چې پر طالبانو څه ډول نظارت او فشارونه غواړي.
طالب چارواکو د امریکا دغو تازه څرګندونو ته کوم غبرګون نه دی ښودلی.