تاند: ( پنجشنبه ، د دلوې اوومه) د افغانستان په اړه د ملګرو ملتونو د امنیت شورا ځانګړې غونډه تېره شپه ترسره شوه، چې په افغانستان کې د دغه سازمان د سرمنشي ځانګړې استازې او د يوناما دفتر مشره مېرمن ديبورا لاينز یې له مهمو ویناوالو څخه وه.
لاینز په دې غونډه کې د افغانستان د روان وضعیت په اړه هم خپل راپور له نړیوالې امنيت شورا سره شریک کړ.
مېرمن لاینز ټینګار وکړ، چې طالبان باید د پراخ بنسټه حکومت د رامنځته کولو او بشري حقونو ته د درناوي په اړه خپلې ژمنې عملي کړي.
نوموړې هيله مندي وښوده، چې طالبان به د ټولو قومونو په ګډون د نظام جوړولو او بشري حقونو ته د درناوي په تړاو درناوي ته قانع کړي.
د يوناما مشرې دا هم وويل، چې طالبان په افغانستان کې د ډېرو فعالانو د لادرکه کیدو او وژلو سبب شوي، چې له دې اړخه وضعيت د اندیښنې وړ دی.
د ملګرو ملتونو د سرمنشي ځانګړې استازې نړیوالې امنيت شورا ته دا يادونه هم وکړه، چې طالبان په ناقانونه توګه خلک نيسي، شکنجه کوي او حتا وژني او ځواب ویلو ته نه حاضريږي.
د مېرمن ديبورا لاينز ټینګار دا و، چې يوازې د ملي روغې جوړې په اړه پراخې خبری افغانستان د يوې متنوع ټولنې او ثبات پر لور بیولای شي.
د ملګرو ملتونو ځانګړې استازې دا هم وويل، چې طالبان د نجونو د ښوونځيو پر وړاندې لا هم خنډ دي او په مختلفو پلمو د دغو ښوونځيو د پرانيستل کيدو پر وړاندې خنډونه جوړوي.
ديبورا لاينز وويل، سره له دې چې ډېرو هېوادونو د افغان ښوونکو او ښوونځيو لګښتونه منلي، خو طالبانو د دغو ښوونځيو د پرانيستل کيدو په اړه خپلې ژمنې نه دي عملي کړي.
ديبورا لاينز له ۱۸ میلیونه فقر ځپلو افغانانو سره د ملګرو ملتونو له لارې د بشري مرستو د ترسره کيدو خبر هم ورکړ، خو غوښتنه یې وکړه چې د افغانستان د کنګل شویو بانکي زېرمو د خلاصون لپاره هم ګام اخیستل ضرور دي، څو د بشري ناورين د مقابلې لپاره استفاده ورڅخه وشي.