تاند: ( پنجشنبه ، د دلوې اوومه) د افغانستان په اړه د ملګرو ملتونو د امنیت شورا ځانګړې غونډه تېره شپه ترسره شوه، چې د دغه سازمان سرمنشي آنتونیو گوترش یې له مهمو ویناوالو څخه و.
نوموړي په خپله وینا کې د بشري حقونو د فعالانو په خپلسرو نیونو انديښنه وښوده او دا يې هم وويل چې ترهګري په افغانستان کې د ودې په حال کې ده.
د ده په وينا، دا خطر یوازې افغانستان ته نه، چې ټولې نړۍ ته د ډېرې اندیښنې وړ دی.
نړيوال سرمنشي له طالبانو وغوښتل، چې بشري حقونه په رسميت وپېژني او ټولو افغانانو ته د هېواد د برخليک ټاکلو په موضوع کې په حق قايل شي.
ښاغلي ګوترش د نجونو د ښوونځيو تړل کیدو ته په اشارې وویل، چې د دوی خوبونه نه بايد اوبه یوسي.
نړيوال سرمنشي د نجونو د ښوونځيو په پرانيستلو له ټينګار سره، افغانستان ته د بشري مرستو چمتو کول هم اړين وبلل.
د ملګرو ملتونو سرمنشي له طالبانو وغوښتل، چې د بشري مرستو د استولو خونديتوب تضمين او ښځينه مرسته رسوونکو ته د فعالیت اجازه ورکړي.
طالبانو د نوموړي څرګندونو ته کوم غبرګون نه دی ښودلی.